Milanning «Inter» klubi himoyachisi Manuel Akanji sobiq jamoasi «Manchester Siti» atrofida davom etayotgan moliyaviy qoidabuzarliklar bilan bog‘liq ish yuzasidan o‘z fikrini bildirdi.

2022–2025 yillarda Manchester klubi sharafini himoya qilgan shveysariyalik futbolchi mazkur jarayon haqida batafsil ma’lumotga ega emasligini, biroq klub rahbariyatiga ishonishini ta’kidladi.

«Men hali ham ayrim futbolchilar bilan aloqadaman. Lekin bu ish haqida sizlardan ko‘proq ma’lumotga ega emasman.

O‘sha paytda bizga xotirjam bo‘lishimiz, klub vaziyatni to‘liq nazorat qilayotgani va hech qanday jiddiy muammo yuzaga kelmagani aytilgandi.

Men «Manchester Siti» rahbariyatiga ishonaman va vaziyat haqiqatan ham ular aytganidek ekaniga umid qilaman.

Sovrinlarimdan mahrum etishmasa, yaxshi bo‘lardi. Aks holda, bu men uchun biroz alamli bo‘ladi.

Ammo men ham bu ish bilan bog‘liq barcha yangiliklarni faqat ommaviy axborot vositalari orqali bilib boryapman», — dedi Akanji.

«Sovrinlarimdan mahrum bo‘lishni istamayman»

Suhbat davomida jurnalistlar Akanji qo‘lga kiritgan sovrinlar qayta ko‘rib chiqilishi kutilmayotganini ta’kidlashdi.

Chunki «Manchester Siti»ga nisbatan olib borilayotgan ish asosan 2009–2018 yillar oralig‘idagi moliyaviy faoliyatga taalluqli.

Manuel Akandji esa Manchester klubiga faqat 2022 yilda kelib qo‘shilgan. Shu sababli uning jamoa bilan erishgan yutuqlari mazkur davrga to‘g‘ri kelmaydi.

Biroq shveysariyalik himoyachi kelgusida yana qanday ma’lumotlar oshkor bo‘lishini oldindan aytish qiyinligini bildirdi.

«Yana nimalarni topishlarini kim biladi? Axir sizlar koronavirus bilan bog‘liq voqealardan ham haligacha nimadir izlayapsizlar. Vaholanki, bu voqealarga besh yil bo‘ldi», — deya javob qaytardi Akanji.

Shu tariqa, «Inter» himoyachisi «Manchester Siti» rahbariyatiga ishonishini bildirish bilan birga, tergov jarayonining ehtimoliy oqibatlari borasidagi noaniqliklarga ham e’tibor qaratdi.