«Arsenal» bosh murabbiyi Mikel Arteta 2019 yil dekabr oyida London klubidagi faoliyatining birinchi kunida sodir bo‘lgan g‘ayrioddiy voqeani esladi.

Ispaniyalik mutaxassis o‘sha paytda amalga oshirgan harakati murabbiylik faoliyatini hali boshlanmasidanoq yakunlab qo‘yishi mumkinligidan xavotirlanganini tan oldi.

Arteta «Arsenal»ning London Kolnidagi mashg‘ulotlar bazasida xonani ataylab ostin-ustun qilgan. U kompyuterlar, noutbuklar va kabellarni polga uloqtirganidan so‘ng futbolchilar hamda klub xodimlarini xonaga chaqirgan.

«Men ularga shunday dedim:

«Eshitinglar, men quyidagi gaplarni eshitdim. Bu qanchalik to‘g‘riligini bilmayman. Ammo turli odamlardan eshitishimcha, tashkilotda ishlash borasidagi umumiy kayfiyat aynan shu holatga o‘xshaydi.

Men bu yerga sizlarga kasbingizdan, hayotingizdan va barchamizni birlashtirib turadigan ishtiyoqdan zavq olishingizga yordam berish uchun keldim.

Agar bu borada sizlarga yordam berishimni istasangiz, xonani tartibga keltirish va hech bo‘lmaganda birgalikda ishlashga tayyor ekaningizni ko‘rsatish uchun ikki daqiqa vaqtingiz bor».

Shundan so‘ng xonadan chiqib ketdim», — dedi Arteta The Athletic nashriga bergan intervyusida.

Murabbiyning ta’kidlashicha, mazkur qaror katta tavakkalchilik edi.

«Bu mening murabbiylik faoliyatimning oxiri bo‘lishi mumkin edi. Chunki qaytib kelganimda hammasi avvalgidek qolganida, men endi ishsiz bo‘lardim!» — dedi u.

Ikki daqiqadan so‘ng Arteta xonaga qaytganida, hamma joy bekamu ko‘st tartibga keltirilgan, barcha esa jim turgan edi.

Ayni paytda «Arsenal» Angliya Premyer-ligasining amaldagi chempioni va o‘tgan mavsumgi UYEFA Chempionlar ligasi finalchisi hisoblanadi.

Arteta klubda ish boshlagan birinchi kundan buyon jamoa tarkibida faqat Bukayo Saka qolgan.

Shuningdek, ispaniyalik mutaxassis «Arsenal» bilan 2030 yilgacha mo‘ljallangan yangi shartnoma imzoladi.

«Kelajagimni ushbu klub bilan bog‘lash men uchun katta sharaf. Bu birgalikda erishishimiz mumkin bo‘lgan yutuqlarning faqat boshlanishi», — dedi Arteta.