«Арсенал» бош мураббийи Микель Артета 2019 йил декабрь ойида Лондон клубидаги фаолиятининг биринчи кунида содир бўлган ғайриоддий воқеани эслади.

Испаниялик мутахассис ўша пайтда амалга оширган ҳаракати мураббийлик фаолиятини ҳали бошланмасиданоқ якунлаб қўйиши мумкинлигидан хавотирланганини тан олди.

Артета «Арсенал»нинг Лондон Колнидаги машғулотлар базасида хонани атайлаб остин-устун қилган. У компьютерлар, ноутбуклар ва кабелларни полга улоқтирганидан сўнг футболчилар ҳамда клуб ходимларини хонага чақирган.

«Мен уларга шундай дедим:

«Эшитинглар, мен қуйидаги гапларни эшитдим. Бу қанчалик тўғрилигини билмайман. Аммо турли одамлардан эшитишимча, ташкилотда ишлаш борасидаги умумий кайфият айнан шу ҳолатга ўхшайди.

Мен бу ерга сизларга касбингиздан, ҳаётингиздан ва барчамизни бирлаштириб турадиган иштиёқдан завқ олишингизга ёрдам бериш учун келдим.

Агар бу борада сизларга ёрдам беришимни истасангиз, хонани тартибга келтириш ва ҳеч бўлмаганда биргаликда ишлашга тайёр эканингизни кўрсатиш учун икки дақиқа вақтингиз бор».

Шундан сўнг хонадан чиқиб кетдим», — деди Артета The Athletic нашрига берган интервьюсида.

Мураббийнинг таъкидлашича, мазкур қарор катта таваккалчилик эди.

«Бу менинг мураббийлик фаолиятимнинг охири бўлиши мумкин эди. Чунки қайтиб келганимда ҳаммаси аввалгидек қолганида, мен энди ишсиз бўлардим!» — деди у.

Икки дақиқадан сўнг Артета хонага қайтганида, ҳамма жой бекаму кўст тартибга келтирилган, барча эса жим турган эди.

Айни пайтда «Арсенал» Англия Премьер-лигасининг амалдаги чемпиони ва ўтган мавсумги УЕФА Чемпионлар лигаси финалчиси ҳисобланади.

Артета клубда иш бошлаган биринчи кундан буён жамоа таркибида фақат Букайо Сака қолган.

Шунингдек, испаниялик мутахассис «Арсенал» билан 2030 йилгача мўлжалланган янги шартнома имзолади.

«Келажагимни ушбу клуб билан боғлаш мен учун катта шараф. Бу биргаликда эришишимиз мумкин бўлган ютуқларнинг фақат бошланиши», — деди Артета.