Fransiya milliy terma jamoasi va Londonning «Arsenal» klubi sobiq futbolchisi Rober Pires «Bavariya» hamda Fransiya terma jamoasida yuqori sermahsullik namoyish etayotgan Maykl Oliseni maqtadi.
Pires 24 yoshli futbolchining so‘nggi mavsumlardagi o‘yini va maydondagi imkoniyatlarini yuqori baholadi.
«Bu futbolchini yaxshi bilsangiz, uning so‘nggi mavsumlarda «Bavariya» va Fransiya terma jamoasida nimalar qilayotganini ko‘rsangiz, u shunchaki fantastik futbolchi ekanini tushunasiz.
U o‘ng qanotda ham, 10-raqam pozisiyasida ham o‘ynay oladi. U mehnatkash, jamoa manfaati uchun harakat qiladigan futbolchi.
U maydonga «Raqibimga jiddiy muammo tug‘diraman» degan kayfiyatda tushdi va buning uddasidan chiqdi.
Men uning o‘yiniga qoyil qolyapman. Chunki u menga juda yoqadigan futbolchi. Qolaversa, u men juda yaxshi biladigan pozisiyada harakat qiladi», — dedi Pires.
Maykl Olise yangi mavsumni yuqori sermahsullik bilan boshladi. U «Bavariya» safida o‘tkazgan yettita uchrashuvida sakkizta gol urib, to‘rtta golli uzatmani amalga oshirdi.
24 yoshli futbolchi so‘nggi xalqaro tanaffus davomida ham samarali o‘yin ko‘rsatdi.
Xususan, Olise Fransiya milliy terma jamoasi safida UEFA Millatlar ligasining to‘rtta uchrashuvida maydonga tushib, to‘rtta gol va ikkita golli uzatma qayd etdi.
