Argentina prokuraturasi afsonaviy futbolchi Diyego Maradona vafotidan oldin uni parvarish qilgan tibbiyot xodimlarini 12 yilgacha ozodlikdan mahrum etishni talab qildi. Ayblov tomoni tibbiy jamoa tartibsiz ishlagani va bemorga zarur darajada yordam ko‘rsatmaganini ta’kidlamoqda, deb xabar berdi Al Jazeera.

Maradona 2020 yil 25 noyabr kuni bosh miyasidagi qon laxtasini olib tashlash operasiyasidan keyin tiklanayotgan paytida vafot etgan. Uning o‘limi bilan bog‘liq ish doirasida yetti nafar tibbiyot mutaxassisi 2026 yil aprel oyidan beri sudlanmoqda. Ular orasida futbolchining shaxsiy shifokori Leopoldo Lukke, psixiatr, psixolog, hamshiralar va tibbiy yordamni muvofiqlashtiruvchi mutaxassislar bor. Ular tibbiy yordam ko‘rsatishda jiddiy qoidabuzarliklarga yo‘l qo‘yganlikda ayblanmoqda. Barcha ayblanuvchilar o‘z aybini inkor etmoqda.

Yakuniy nutqida prokuror Patrisio Ferrari tibbiy jamoa ishining «tartibsiz tashkil etilgani» Maradonaga yordamsiz holda qolishiga sabab bo‘lganini aytdi. Uning ta’kidlashicha, bemor amalda o‘z holiga tashlab qo‘yilgan.

Ayblov tomoni tibbiyot xodimlari o‘z vazifalarini bajarmagani va zarur choralarni ko‘rmaganini bildirmoqda.

Prokuratura eng og‘ir jazo — 12 yillik qamoq muddatini Maradonasning shaxsiy shifokori Leopoldo Lukke uchun so‘radi. Qolgan tibbiyot xodimlari uchun esa to‘rt yildan 10 yilgacha ozodlikdan mahrum etish jazosi talab qilindi.