«Barselona»ning braziliyalik hujumchisi Rafinya Dias Ispaniya La Ligasi doirasida «Xetafe»ga qarshi bo‘lib o‘tadigan uchrashuvda ishtirok etishi mumkin.

Bu haqda jurnalist Karlos Monfort xabar berdi.

Manba ma’lumotlariga ko‘ra, Rafinya o‘yinoldi mashg‘ulotida o‘zining jismoniy tayyorgarligini sinovdan o‘tkazib, «Xetafe»ga qarshi bahsda maydonga tushish imkoniyatini baholamoqchi.

Ta’kidlanishicha, hujumchining uchrashuvda ishtirok etish ehtimoli past. Shunga qaramay, uning bir necha daqiqa maydonda harakat qilishi uchun kichik imkoniyat saqlanib qolmoqda.

Eslatib o‘tamiz, Rafinya jarohati sabab Braziliya terma jamoasi ixtiyoridan muddatidan avval klubiga qaytgan edi.

Braziliyalik futbolchi joriy mavsumda «Barselona» safida sakkizta uchrashuvda maydonga tushib, 14 ta gol urgan va uchta golli uzatmani amalga oshirgan.

«Barselona» va «Xetafe» o‘rtasidagi uchrashuv 10 oktyabr kuni bo‘lib o‘tadi.

Bahs O‘zbekiston vaqti bilan soat 21:30 da boshlanishi rejalashtirilgan.