Madridning "Atletiko" klubi bosh murabbiyi Diyego Simeone milliy terma jamoalar o‘yinlari munosabati bilan yuzaga keladigan tanaffuslarda futbolchilarga tushayotgan yuklamadan xavotir bildirdi.

Argentinalik mutaxassis xalqaro uchrashuvlar taqvimini qayta ko‘rib chiqish zarurligini ta’kidladi.

"Avvalo, bu vaziyatga futbolchilarning manfaatlari nuqtai nazaridan baho berish kerak.

Uzoq parvozlar va jismoniy yuklamalarni hisobga olsak, aksariyat futbolchilar to‘rtta, ayrimlari esa uchta uchrashuvda ishtirok etdi. Yevropada terma jamoalar to‘rttadan o‘yin o‘tkazmoqda.

Futbol — bu tomosha, odamlar esa futbolchilarni eng yaxshi sport formasida ko‘rishni istaydi.

Biroq biz bunday holat tobora kamroq kuzatiladigan vaziyatga yaqinlashmoqdamiz.

Futbolchilar endi tez-tez o‘zlarining maksimal imkoniyatlarini namoyish eta olmayapti.

Moliyaviy jihatdan bu terma jamoalar uchun foydali, ammo futbolchilarning o‘z fikriga ham quloq tutish zarur.

Chunki aynan ular maydonga tushib, odamlarga zavq bag‘ishlaydi", — deya Simeonening so‘zlarini keltiradi AS nashri.

Milliy terma jamoalar o‘yinlari uchun ajratilgan so‘nggi tanaffus sentyabr oyida boshlanib, oktyabr oyi boshida yakunlandi.

Ushbu davr mobaynida Yevropa terma jamoalari to‘rttadan uchrashuv o‘tkazdi.