Taniqli insayder Fabrisio Romano Madridning «Real» klubi markaziy himoyachisi Raul Asensioning kelajagi haqida fikr bildirdi.
23 yoshli futbolchi so‘nggi vaqtlarda sog‘lig‘i bilan bog‘liq muammolarga duch kelmoqda. Yaqinda ispaniyalik himoyachi katta boldir suyagi singani sabab jarrohlik amaliyotini o‘tkazishga majbur bo‘ldi.
«Men 2027 yilda Asensio atrofidagi vaziyatni diqqat bilan kuzatgan bo‘lardim. Katta ehtimol bilan, yozda uning transferi haqida ko‘plab gap-so‘zlar bo‘ladi», — dedi Romano.
O‘tgan transfer oynasida ham futbolchining «Real»ni tark etishi mumkinligi haqida mish-mishlar tarqalgan edi. Biroq klubga ma’qul keladigan jiddiy takliflar bo‘lmagan.
«O‘tgan yozda hech kim «Real»ni ham, Raulning o‘zini ham qoniqtiradigan taklif bilan chiqmadi», — deya qo‘shimcha qildi insayder.
Asensioning maydonga qaytishi kelasi yilning boshiga rejalashtirilgan.
