Saudiya Arabistonining "An-Nasr" klubi himoyachisi Navaf Bushal Osiyo Chempionlar ligasi Elit turnirining 2-turidan o‘rin olgan Farg‘onaning "Neftchi" jamoasiga qarshi uchrashuv oldidan tashkil etilgan matbuot anjumanida ishtirok etdi.
Saudiyalik futbolchi jamoasining qit’a musobaqasidagi maqsadlari, muxlislar qo‘llab-quvvatlovi va klub bilan shartnomasini uzaytirish masalasi haqida o‘z fikrlarini bildirdi.
"Barcha musobaqalarda chempionlik uchun kurashamiz"
Bushal "An-Nasr" ishtirok etayotgan har bir musobaqada eng yuqori natijani ko‘zlashini ta’kidladi. Uning fikricha, jamoa uchun ichki chempionat va xalqaro turnirlar birdek muhim ahamiyatga ega.
"Biz qatnashadigan har bir musobaqada g‘olib chiqishni maqsad qilamiz. Bir turnirani boshqasidan ustun qo‘ymaymiz. Barchasida chempionlikni qo‘lga kiritishga intilamiz", — dedi Bushal.
Futbolchi Saudiya Arabistoni terma jamoasi bilan Fors ko‘rfazi kubogida erishilgan muvaffaqiyat ham unga qo‘shimcha ishtiyoq bag‘ishlaganini qayd etdi. U bu yutuq klub miqyosida ham yangi sovrinlar uchun kurashishga undayotganini bildirdi.
"Muxlislar — bizning asosiy tayanchimiz"
"An-Nasr" himoyachisi "Neftchi"ga qarshi uchrashuvda o‘z maydoni va muxlislar omili muhim ahamiyat kasb etishiga e’tibor qaratdi.
Bushal klub muxlislarining jamoa natijalaridagi o‘rnini yuqori baholab, ularning qo‘llab-quvvatlovi futbolchilarga qo‘shimcha kuch bag‘ishlashini ta’kidladi.
"Muxlislarimiz haqida qancha yaxshi gapirsam ham kam. Ular bizni doimo qo‘llab-quvvatlab kelishadi. Ularning yordami bilan qiyin vaziyatlardan chiqib, yana o‘z o‘yinimizni topdik. Xudo xohlasa, kelgusida ham muxlislarimizni xursand qilishga muvaffaq bo‘lamiz", — dedi futbolchi.
Himoyachi "Neftchi"ga qarshi bahsga jamoa jiddiy tayyorgarlik ko‘rayotganini ham bildirdi. Uning so‘zlariga ko‘ra, birinchi turdagi mag‘lubiyatdan keyin "An-Nasr" o‘z muxlislari qarshisida ijobiy natija qayd etishni maqsad qilgan.
Shartnomani uzaytirish masalasi
Matbuot anjumanida Bushaldan "An-Nasr" bilan amaldagi shartnomasini uzaytirish bo‘yicha muzokaralar haqida ham so‘raldi.
Futbolchi bu masala faqat o‘ziga bog‘liq emasligini ta’kidlab, muzokaralar klub rahbariyati va vakili ishtirokida olib borilayotganini ma’lum qildi.
"Bu masalada klub rahbariyati va agentimga tegishli jihatlar bor. Hammasi ijobiy hal bo‘lishiga va masala imkon qadar tezroq o‘z yechimini topishiga umid qilaman", — dedi Bushal.
Shuningdek, himoyachi o‘yinidagi kamchiliklar yuzasidan bildirilayotgan tanqidlarni qabul qilishini va o‘z saviyasini oshirish ustida ishlashda davom etishini qayd etdi.
"Neftchi"ga qarshi uchrashuv
"An-Nasr" Elit OCHLning dastlabki turida BAAning "Al-Ayn" klubiga 0:4 hisobida mag‘lub bo‘lgan. Saudiya Arabistoni jamoasi endi o‘z maydonida dastlabki g‘alabasini qo‘lga kiritishga intiladi.
Farg‘onaning "Neftchi" klubi esa musobaqani muvaffaqiyatli boshlagan. Islombek Ismoilov boshchiligidagi jamoa birinchi turda Iroqning "Al-Quva Al-Javiya" klubini 1:0 hisobida mag‘lub etgan.
"An-Nasr" — "Neftchi" uchrashuvi bugun, 12 oktyabr kuni Ar-Riyoddagi "Al-Avval Park" stadionida bo‘lib o‘tadi. Bahs O‘zbekiston vaqti bilan soat 23:15 da boshlanadi.
