«Manchester Yunayted» bosh murabbiyi Maykl Kerrik Chempionlar ligasi umumiy bosqichining 2-turida Madridning «Atletiko»siga qarshi bo‘ladigan uchrashuv oldidan yarim himoyachi Brunu Fernandeshning ayni paytdagi holati haqida fikr bildirdi. Sentyabr oyida Portugaliya terma jamoasi murabbiyi Jorje Jezush futbolchi milliy jamoa ixtiyoriga jarohat bilan kelgani va og‘riqqa qaramay o‘ynaganini ma’lum qilgan edi.

«Brunu yana o‘zining eng yaxshi jismoniy holatiga qayta oladimi? Albatta, bunga qodir, chunki biz yuqori darajadagi futbolchi haqida gapiryapmiz. Ba’zan ishlar istagandek ketmaydi, shunday davrlar ham bo‘lib turadi. Ushbu klub uchun aql bovar qilmas ishlarni amalga oshirgan va kelajakda ham shunday natijalarga erishadi. Bunga hech qanday shubham yo‘q.

Brunu terma jamoada o‘ynadi va u yerda muayyan muammolarga duch keldi. Ammo menimcha, bunday holatlar tez-tez uchrab turadi. Balki odamlar buni anglamas, lekin futbolchilar og‘riqqa qaramay maydonga tushishadi. Men ham shunday o‘ynaganman va faoliyatim davomida ehtimol, o‘yinlarning 80 foizida u yoki bu noqulaylikni his qilganman. Bu ideal holat emas, ammo uni yengib o‘tish mumkin.

Brunu so‘nggi uchrashuvlarda o‘ynay oldi. Unda buning uchun zarur bo‘lgan fidoyilik bor. Shuning uchun, ha, u bu muammoni deyarli yengib o‘tdi. Hali kichik muammolar bor, ammo aytganimdek, bunday holatlar barcha jamoalarda uchraydi. Shu bois hozir bu katta ahamiyatga ega emas. Brunu yaxshi holatda, bugun ertalab uning kayfiyati a’lo edi va u o‘yinni intiqlik bilan kutmoqda», — deya Kerrikning so‘zlarini «Manchester Yunayted» rasmiy sayti keltiradi.