Ispaniya terma jamoasi va Londonning "Tottenxem" klubi qanot himoyachisi Pedro Porro o‘z vataniga qaytishi mumkin. Bu haqda insayder Ekrem Konur ijtimoiy tarmoqlar orqali xabar berdi.
Jurnalistning ma’lum qilishicha, 27 yoshli futbolchi Madridning "Real" klubi e’tiboriga tushgan. "Qirollik klubi" himoyachining o‘yinlarini kuzatib bormoqda. Madridliklar o‘ng qanot himoyachisi pozisiyasini kuchaytirishni istamoqda.
Avvalroq Porroni o‘z safiga qo‘shib olishga Kataloniyaning "Barselona" klubi ham qiziqish bildirayotgani xabar qilingan edi.
Transfermarkt portali 27 yoshli futbolchining transfer qiymatini 45 million yevroga baholamoqda. Porroning "Tottenxem" bilan amaldagi shartnomasi 2031 yilning iyun oyi oxiriga qadar mo‘ljallangan.
