Professional boksning WBA yo‘nalishi bo‘yicha birinchi o‘rta vazn toifasida sobiq jahon chempioni Isroil Madrimovning ozarbayjonlik Seymur Isayevga qarshi jangi dekabr oyiga ko‘chirildi.
Lift Promotions kompaniyasi xabariga ko‘ra, joriy yilning 30 oktyabr kuni Toshkentdagi Humo Arena majmuasida o‘tkazilishi rejalashtirilgan xalqaro boks oqshomi tashkiliy sabablar tufayli 10 dekabr kuni bo‘lib o‘tadi. Tashkilotchilar yuzaga kelgan noqulayliklar uchun muxlislardan uzr so‘rab, muxlislar xavfsizligi birinchi o‘rinda ekanini ta’kidlagan.
Madrimovning raqibi — o‘z vaqtida UBO versiyasi bo‘yicha jahon chempioni bo‘lgan ozarbayjonlik Seymur Isayev (15-2, 13 KO). U so‘nggi beshta jangining ikkitasida imkoniyatni boy berganiga qaramay, oxirgi uchta to‘qnashuvda ketma-ket g‘alabaga erishgan.
Ayni paytda The Ring jurnali reytingida o‘z vazn toifasida (69,9 kg) 4-o‘rinni egallab turgan Isroil Madrimov (11-2-1, 7 KO) uchun bu 2026 yildagi ikkinchi jang bo‘ladi. O‘zbekistonlik bokschi so‘nggi bor shu yilning yanvar oyida AQSHda ringga ko‘tarilib, dominikanlik Luis Devid Salazarni ochkolar hisobiga ko‘ra mag‘lubiyatga uchratgan edi.
