Xalqaro futbol assosiasiyalari federasiyasi (FIFA) prezidenti Janni Infantino tashkilot kengashi yig‘ilishida jahon chempionatini o‘tkazish huquqlarining bir qismini sotish rejasi uchun uzr so‘radi. Biroq u ishtirokchilarni qiziqtirgan muhim savollarga javob bermadi. Bu haqda ESPN xabar bermoqda.
FIFA kengashining yig‘ilishi 15 oktyabr, payshanba kuni Syurix shahrida bo‘lib o‘tdi. Ma’lum qilinishicha, yig‘ilishning asosiy mavzulari qatorida Jahon chempionati-2026 vaqtida AQSH terma jamoasi hujumchisi Folarin Baloguning diskvalifikasiyasi bekor qilingani bilan bog‘liq shov-shuvli qaror hamda jahon chempionatiga bo‘lgan huquqlarning bir qismini sotish rejasi bo‘lgan.
Qayd etilishicha, Infantino FIFA faoliyatida eng ko‘p xavotir uyg‘otayotgan masalalar bo‘yicha na yangi tafsilotlarni, na hujjatlarni taqdim etgan.
FIFA vise-prezidenti, shuningdek, Angliya futbol assosiasiyasi rahbari Debbi Xyuittning ma’lum qilishicha, uch yarim soat davom etgan uchrashuvda Infantinoning rejasiga nisbatan yozma dalillar taqdim etishni talab qilgan Yevropa futbol amaldorlari bilan munozara bo‘lgan.
Ular Jahon chempionatiga xususiy kapitalni jalb qilish rejasi bo‘yicha yozma isbotlar taqdim etilishini talab qilgan. Biroq Infantino amaldorlarga o‘z savollarini yozma ravishda shakllantirishni taklif qilgan.
