Халқаро футбол ассоциациялари федерацияси (ФИФА) президенти Жанни Инфантино ташкилот кенгаши йиғилишида жаҳон чемпионатини ўтказиш ҳуқуқларининг бир қисмини сотиш режаси учун узр сўради. Бироқ у иштирокчиларни қизиқтирган муҳим саволларга жавоб бермади. Бу ҳақда ESPN хабар бермоқда.
ФИФА кенгашининг йиғилиши 15 октябрь, пайшанба куни Цюрих шаҳрида бўлиб ўтди. Маълум қилинишича, йиғилишнинг асосий мавзулари қаторида Жаҳон чемпионати-2026 вақтида АҚШ терма жамоаси ҳужумчиси Фоларин Балогунинг дисквалификацияси бекор қилингани билан боғлиқ шов-шувли қарор ҳамда жаҳон чемпионатига бўлган ҳуқуқларнинг бир қисмини сотиш режаси бўлган.
Қайд этилишича, Инфантино ФИФА фаолиятида энг кўп хавотир уйғотаётган масалалар бўйича на янги тафсилотларни, на ҳужжатларни тақдим этган.
ФИФА вице-президенти, шунингдек, Англия футбол ассоциацияси раҳбари Дебби Хьюиттнинг маълум қилишича, уч ярим соат давом этган учрашувда Инфантинонинг режасига нисбатан ёзма далиллар тақдим этишни талаб қилган Европа футбол амалдорлари билан мунозара бўлган.
Улар Жаҳон чемпионатига хусусий капитални жалб қилиш режаси бўйича ёзма исботлар тақдим этилишини талаб қилган. Бироқ Инфантино амалдорларга ўз саволларини ёзма равишда шакллантиришни таклиф қилган.
