Ispaniyalik yarim himoyachi Ander Errera "PSJ" safida Lionel Messi bilan birga to‘p surgan davrlarini esladi.
37 yoshli futbolchi Rio Ferdinandga bergan intervyusida o‘sha paytda Parij klubida o‘ynagan ko‘plab yulduzlar orasida aynan argentinalik hujumchi unda eng katta taassurot qoldirganini ta’kidladi.
"Messi — bu butunlay boshqa daraja. Biz bunday futbolchini boshqa ko‘rmasak kerak. Uning betakrorligi faqat o‘yinlarda emas, balki har bir mashg‘ulotda ham namoyon bo‘lardi.
Men uning necha marta to‘pni yo‘qotishini sanab ko‘rishga harakat qilganman, ammo u umuman to‘p yo‘qotmasdi. Mashg‘ulotlarda "rondo" mashqini bajarganimizda, u hech qachon doira markaziga tushmasdi. Chunki Messi to‘pni yo‘qotmasdi. Bu aqlbovar qilmas holat edi.
Masalan, Neymar haqida gapiradigan bo‘lsak, u mashg‘ulotlarda har doim ham o‘zining bor imkoniyatini namoyish etmasligini bilasiz. Ammo o‘yin paytida u o‘z mahoratini ko‘rsatib, uchrashuv taqdirini hal qilishi mumkin.
Leo esa istisnosiz har kuni sizni hayratga soladi. Aynan shuning uchun ham u hozirgacha bunday yuqori darajada o‘ynamoqda", — deya Erreraning so‘zlarini keltiradi TyC Sports nashri.
Eslatib o‘tamiz, Lionel Messi 2021–2023 yillar davomida "PSJ" sharafini himoya qilgan. Ayni paytda argentinalik yulduz AQSHning "Inter Mayami" klubida faoliyatini davom ettirmoqda.
