Madridning «Real» klubi himoyachisi Ferlan Mendi voyaga yetmagan o‘smirga uning itlaridan biri hujum qilgani sabab sudga tortiladi. Bu haqda Sport.es nashri xabar bermoqda.
Ma’lum qilinishicha, Madrid jinoyat ishlari bo‘yicha sudi mazkur ish yuzasidan sud jarayonini 21 dekabr kuniga belgilagan.
Mendi tan jarohati yetkazish bilan bog‘liq huquqbuzarlikda ayblanmoqda. 2023 yil 4 yanvar kuni futbolchining nazoratsiz qolgan to‘rtta iti hovlidan chiqib ketgan. Ulardan biri 17 yoshli o‘smirning oyog‘ini tishlagan, shuningdek, yana ikkita itga ham hujum qilgan. Jarohat olgan itlardan birini keyinchalik ahvoli og‘irligi sababli uxlatishga to‘g‘ri kelgan.
Manbaga ko‘ra, prokuratura «Real» himoyachisini 1,2 ming yevro miqdorida jarimaga tortishni, shuningdek, jabrlanuvchilarga jami 5,7 ming yevro tovon puli to‘lashni talab qilmoqda.
