O‘zbekiston futbol assosiasiyasi murabbiylar kengashining navbatdagi yig‘ilishi bo‘lib o‘tdi.

Yig‘ilish kun tartibiga muvofiq, turli yosh toifalaridagi terma jamoalar bosh murabbiylarining xalqaro musobaqalardagi ishtirok va kelgusi turnirlarga tayyorgarlik yuzasidan hisobotlari tinglandi.

Dastlab O‘zbekiston U-23 terma jamoasining Osiyo o‘yinlaridagi ishtiroki tahlil qilindi.

Muhokamalar davomida barcha yosh toifalaridagi terma jamoalar murabbiylariga futbolchilarning jismoniy tayyorgarligini yanada yaxshilash, taktik va psixologik tayyorgarlikni kuchaytirish bo‘yicha tegishli topshiriqlar berildi.

Xalqaro musobaqalarga tayyorgarlik jarayonida barcha jihatlarni hisobga olish, standart vaziyatlar va penalti zarbalari ustida ishlashga alohida e’tibor qaratish, shuningdek, hujumchilar hamda darvozabonlarning individual tayyorgarligini kuchaytirish tavsiya etildi.

Shu bilan birga, terma jamoalar murabbiylar shtabida tahlilchilar va yuqori malakali jismoniy tayyorgarlik bo‘yicha mutaxassislar doimiy ravishda faoliyat yuritishi zarurligi ta’kidlandi.

Yig‘ilishda O‘zbekiston U-20, U-17 va U-16 terma jamoalari, shuningdek, U-17 qizlar terma jamoasi bosh murabbiylarining o‘quv-mashg‘ulot yig‘inlari hamda navbatdagi musobaqalarga tayyorgarlik rejalari ham ko‘rib chiqildi.