Ўзбекистон футбол ассоциацияси мураббийлар кенгашининг навбатдаги йиғилиши бўлиб ўтди.

Йиғилиш кун тартибига мувофиқ, турли ёш тоифаларидаги терма жамоалар бош мураббийларининг халқаро мусобақалардаги иштирок ва келгуси турнирларга тайёргарлик юзасидан ҳисоботлари тингланди.

Дастлаб Ўзбекистон U-23 терма жамоасининг Осиё ўйинларидаги иштироки таҳлил қилинди.

Муҳокамалар давомида барча ёш тоифаларидаги терма жамоалар мураббийларига футболчиларнинг жисмоний тайёргарлигини янада яхшилаш, тактик ва психологик тайёргарликни кучайтириш бўйича тегишли топшириқлар берилди.

Халқаро мусобақаларга тайёргарлик жараёнида барча жиҳатларни ҳисобга олиш, стандарт вазиятлар ва пенальти зарбалари устида ишлашга алоҳида эътибор қаратиш, шунингдек, ҳужумчилар ҳамда дарвозабонларнинг индивидуал тайёргарлигини кучайтириш тавсия этилди.

Шу билан бирга, терма жамоалар мураббийлар штабида таҳлилчилар ва юқори малакали жисмоний тайёргарлик бўйича мутахассислар доимий равишда фаолият юритиши зарурлиги таъкидланди.

Йиғилишда Ўзбекистон U-20, U-17 ва U-16 терма жамоалари, шунингдек, U-17 қизлар терма жамоаси бош мураббийларининг ўқув-машғулот йиғинлари ҳамда навбатдаги мусобақаларга тайёргарлик режалари ҳам кўриб чиқилди.