Madridning «Real» klubi darvozaboni Tibo Kurtua «Barselona»ga qarshi bo‘lajak «el-klasiko» haqida o‘z fikrlarini bildirdi.

Ispaniya chempionatining 10-turidan o‘rin olgan uchrashuv 25 oktyabr kuni «Kamp Nou» stadionida bo‘lib o‘tadi. Bahs Toshkent vaqti bilan 01:00 da, 26 oktyabrga o‘tar kechasi boshlanadi.

«Biz «Kamp Nou»ga g‘alaba qozonish uchun boramiz. O‘z kuchimizga ishonamiz. Himoyada yaxshi harakat qilishimiz va yaratilgan imkoniyatlardan unumli foydalanishimiz kerak.

«Barselona» La Ligada bizdan yaxshiroq o‘ynayotgani rost. Ammo «el-klasiko»da imkoniyatlar deyarli har doim teng bo‘ladi — 50 ga 50», — deya Kurtuaning so‘zlarini keltiradi Madrid Universal.

«Barselona» Ispaniya chempionatining dastlabki to‘qqizta turida maksimal 27 ochko jamg‘arib, turnir jadvalida peshqadamlik qilmoqda. «Real» esa kataloniyaliklardan 6 ochko ortda qolgan holda uchinchi o‘rinni egallab turibdi.