Доҳа, 16 март – Бугун маҳаллий вақт билан 10:45 да, “Жассим бин Ҳамад” стадионидаги матбуот марказида “Локомотив” ва “Ас-Садд” жамоалари ўртасида ўйин олди матбуот анжумани бўлиб ўтди. Регламентга кўра, журналистлар олдига биринчи бўлиб меҳмон жамоа вакиллари чиқишди.

Бош мураббий Вадим Абрамов, ўз олдига Жасур Ҳасановни (катта) таклиф этди.

“Ал-Cадд” — кучли жамоа ва айни дамда гуруҳимиз етакчиси. Шундай бўлсада, биз бор имкониятимизни йўлга солиб ғалаба қозониш учун майдонга тушамиз. Гуруҳдан чиқишимиз учун ва мусобақани давом эттириш учун бошқа иложимиз йўқ. Эртага ҳаммасини вақт кўрсатади, ким қандай тайёргарлик кўрганини, 90 дақиқа давомида майдонда томоша қиламиз, ортиқча тавсифга ҳожат бўлмаса керак”, - дейди Абрамов, журналистлар саволига жавоб берар экан.

Доҳа телевидениеси вакили Жасур Ҳасановга юзланиб, Қатарга яна бир бор хуш келибсиз, бу ер сизга бегона эмас, “Ас-Cадд” борасида жамоадошларингиз билан ўртоқлашдингизми”, — дея савол берди.

“Қатарда икки жамоада тўп сурганман, “Лахвия” ва “Қатар” СКда, чемпионат доирасида “Ас-Cадд”га қарши бир неча бор майдонга тушганман. Кучли жамоа, айниқса ярим ҳимоя чизиғи, шундай бўлсада "Садд"га қарши ўйинга тушганимда жамоам фақат ғалаба қозонган. Ўйлайманки, эртага ҳам айнан шундай бўлади”, — дея жавоб қайтарди Жасур Ҳасанов.

Эслатиб ўтамиз, эртага Тошкент вақти билан 20:45да, Осиё Чемпионлар Лигаси доирасидаги 3-тур, “С” гуруҳидан ўрин олган учрашувда Қатарнинг “Ас-Садд” жамоаси, Тошкентнинг “Локомотив” клубига қарши майдонга тушади. Севимли жамоамизга омад тилаган ҳолда, эртанги ўйиндан фақат ғалаба кутиб қоламиз.