Осиё чемпионлар лигасининг “А” гуруҳидан ўрин олган “Бунёдкор” ва “Лахвия” жамоалари ўртасидаги ўйиндан олдин матбуот анжумани ўтказилди. Унда дастлаб "Лахвия" вакиллари Микаел Лаудруп ва Владимир Вайс иштирок этишди.

“Бунёдкор”ни яхши ўргандик ва айтишим мумкинки, уларга қарши қийин ўйин бўлади. Биз учун ушбу гуруҳдаги энг муҳим ўйин бўлади. Эртага ҳужумкор ўйин кўрсатишга ҳаракат қиламиз. "Бунёдкор" ҳам олдинги чизиқда тўп тепишни ёқтиради. "Бунёдкор"ни Россия жамоаларига ўхшатиш ҳам мумкин. Рақибимизнинг ўйин услуби русларникига яқинроқ.

Биз гуруҳнинг барча қолган ўйинларида ғалаба қозонишни истаймиз. Қатар чемпионатида соврин ютиш асосий мақсадимиз. Мен ҳам кўпроқ шуни истаяпман. Сабаби, чемпион бўлсак, келаси йили яна ОЧЛда иштирок этамиз

Афсуски, Себастьян Сория олдинги ўйинда жароҳат олди ва у Тошкентга кела олмади. Ёзда “Лахвия” билан шартномам тугайди, унгача уни чўздириш масаласини кўриб чиқамиз” – дейди Лаудруп.

“ОЧЛ нуфузли мусобақа ва унда жамоалар катта мақсад билан майдонга тушади. “Бунёдкор” кучи жамоа ва уларга қарши яхши ўйин намойиш қилиб, ғалаба қозонишга умид қиламиз. Бугун Тошкентга келдик, эртага ўйин ўтказамиз ва учрашувдан кейин бирдан ортга қайтамиз. Бу жиҳат бизга ортиқча босим юкламайди”, - дейди Владимир Вайс.