Эртага “Бунёдкор” Осиё Чемпионлар Лигасининг гуруҳ босқичи 3-тур доирасида Қатарнинг “Лахвия” клубини қабул қилади. Бугун ҳар иккала жамоа бош мураббийлари ва футболчилари ўртасида матбуот анжумани ташкил этилди. Анжуманнинг иккинчи қисмида мезбонлар устози Сергей Лушан иштирок этди. “Бунёдкор” расмий твиттери анжуманни бевосита ёритиб борди.
Сергей Лушан: - Қизиқ учрашув бўлади. Рақибнинг ҳам, бизнинг ҳам ўйин услубимиз деярли бир хил. Cория Тошкентга келмагани яхши хабар. Лекин "Лаҳвия" сафида кучли ўйинлар жуда кўп. Айниқса, маҳоратли ҳужумчилар талайгина. Рақибни ўрганиб чиқдик. Улар чемпионатда бошқа, Чемпионлар Лигасида бошқа таркиб билан ўйнашмоқда. Уларда тенг кучли иккита таркиб бор.
Биз ҳар қандай ҳолатга тайёрмиз. Илк голни урсак ҳам, ўтказсак ҳам бунга яраша тактикамиз бор. Вазиятдан келиб чиққан ҳолда иш тутамиз. Бизда мақсад битта - ютиш! Бошқа гап бўлиши мумкин эмас. Нимани ҳисобига ютиш мумкин? Албатта ўз маҳоратимиз ва меҳнатимиз ҳисобига ютишга ҳаракат қиламиз. Озгина омад ҳам керак. Агар озгина омад кулиб боқса, албатта ютуқ биз тарафда бўлади. Йигитларга бироз далда керак.
Чемпионлар Лигасида "Пахтакор", "Насаф" ва "Локомотив"га мухлислик қиламан. Эртага ҳамма бирлашиши керак. Бизга далда жуда ҳам муҳим.
