"Пахтакор" - "Ал-Айн" ўйинидан олдинги матбуот анжуманининг иккинчи қисмида мезбонлар бош мураббийи Самвел Бабаян ва ҳужумчи Игорь Сергеев иштирок этишди.

Бабаян: — Бугун ва эртага мамлакатимиз учун катта футбол байрами, дейди Бабаян матбуот анжумани аввалида. — Рақиб жуда жиддий. Улар ўз вақтида ОЧЛда ғалаба қозонишган. Қолаверса, жамоа ўтган мавсумда ОЧЛда ярим финалга чиқа олган. Жамоа базаси ҳам анча мустаҳкам. "Ал-Айн" сафида БАА терма жамоасининг 6 нафар футболчиси ўйнайди. Шундай экан, рақиб ҳақида ортиқча тўхталиш шарт эмас.

Сергеев: — Мураббий фикрига қўшиламан. Биз эртага ушбу мавсумдаги энг кучли рақибга қарши тўп сурамиз. Улар сафида жуда кучли жамоалар бор. Биз ўйинга яхши тайёргарлик кўрдик.

— Жамоа учта ўйин бери ғалаба қозона олмаяпти ва бу эртанги ўйин олдидан босим юклайдими?
— Ҳар бир жамоа олдида қийин вазиятлар бўлади. Биз аввалги ўйинлардан керакли хулосалар чиқардик деб ўйлайман.

— Айрим ҳолларда гол бўлмайди деган вазиятларда гол урганингизга гувоҳ бўламиз, аммо айрим вазиятларда 100 фоизлик вазиятлардан ҳам ура олмадингиз. Нима учун шундай бўлмоқда?
Игорь Сергеев: — Ҳужумчининг вазифаси гол уриш ва биз бунинг учун машғулотларда қаттиқ тер тўкамиз. Нима учун шундай бўлаётганини билмайман. Балки яна ишлашимиз керак. Футболда бундай вазиятлар кўп бўлади. Шахсан мен ҳар бир вазиятдан унумли фойдаланишга ҳаракат қиламан.

— Рақиб мураббийи гуруҳдан чиқиш учун 9 очко етарли деган фикр билдирди. Сиз ушбу фикрга қўшиласизми?
— Ҳар хил вазият бўлиши мумкин. Мен ҳозирдан ҳисоб-китоб қилмаган бўлар эдим. Майдонга чиқиб ўйнаш ва ғалаба қозониш керак.