KUN.UZ: Фарғона шаҳрида Наврўз байрами арафасида янги қуриб битказилган марказий “Истиқлол” номли стадион фойдаланишга топширилди. Стадионнинг очилиш маросимида вилоят ҳокими Шуҳрат Ғаниев иштирок этди.

Ўзбекистон президентининг 2011 йил 15 ноябрдаги “2012-2015 йилларда Фарғона шаҳрининг бош режасини амалга ошириш, ижтимоий ва транспорт-коммунал инфратузилмаси объектларини қуриш ва реконструкция қилиш чора-тадбирлари тўғрисида”ги қарорига мувофиқ Фарғона шаҳрида улкан бунёдкорлик ишлари амалга оширилмоқда.

Ўзбекистонда спортни, хусусан, болалар спортини ривожлантиришга қаратилаётган алоҳида эътибор, айниқса, футболнинг моддий-техник базасини янада мустаҳкамлаш доирасидаги ишларнинг изчил давоми сифатида янгидан бунёд этилган 20 минг ўринли стадион ўзининг ноёб меъморий-муҳандислик ечими, бетакрор дизайни билан шаҳар кўркига кўрк қўшди.

Маълум қилинишича, “Истиқлол” стадиони халқаро талабларга тўла жавоб беради. Стадионда тўртта ёритиш минораси ўрнатилган. Майдонга Голландиядан келтирилган махсус майса уруғи сепилган.

Видео табло, замонавий аудиосистема мосламалари ва бошқа ахборот-коммуникация технологиялари билан жиҳозланган шарҳловчилар хонаси ўйин пайтида мухлисларни зарур маълумотлар билан тезкор равишда хабардор этиш, мусобақаларни тўғридан-тўғри эфирга узатиш, теле ва радио трансляция сифатини таъминлашга хизмат қилади.

Қайд этилишича, Фарғона вилоятида айни дамда 4 профессионал ва 24 ҳаваскор футбол клуби, 14 футбол мактаби фаолият кўрсатмоқда.