Ўзбекистон дзюдо терма жамоаси аъзоси Шарафуддин Лутфуллаев Тбилисида ўтказилган 2015 йил мавсуми Гран-Присида 60 кг вазн тоифасида ғолибликни қўлга киритди.
Финалгача ўзбек спортчиси уч рақиби билан куч синашди. Улар Франция, Қозоғистон ва Грузия вакиллари эди. Финалда эса германиялик Тобиас Энгльмайэр билан рўбарў келди. Рақиби устидан ғалаба қозонган Лутфуллаев турнир ғолибига айланди.
Шарафуддин Лутфуллаев Тошкентда ўтказилган 2013 йил Гран-Присида ғолибликни қўлга киритган, 2013 йилги Абу Даби Гран Присида кумуш, 2014 йили Бакуда ўтказилган Катта Шлем мусобақасида эса бронза медалларига сазовор бўлди. Энди унинг медаллари сони яна биттага кўпайди.
Шунингдек, терма жамоанинг бошқа аъзоси Диёрбек Ўрозбоев бронза медалига эга бўлди. У Туркия, Арманистон ва Мўғулистон спортчилари устидан ғалаба қозониб, ярим финалда ўша Тобиас Энгльмайэрдан енгилди. Учинчи ўрин учун кечган баҳсда қозоғистонлик дзюдочи устидан ғалаб қозонди.
Тбилисидаги Гран При баҳсларига 42 мамлакатдан 345 спортчи ташриф буюрган бўлиб, улардан 10 нафари Ўзбекистон вакилларидир.
