Бугун Жанубий Корея кей-лигасида 3-тур ўйинларининг бир нечтаси бўлиб ўтди. Дастлаб “Бусан” – “Гвангжу” ўйинида меҳмонлар 3:2 ҳисобида драматик ғалабага эришишган бўлса, “Жежу Юнайтед” – “Теджон” ўйинида мезбонлар кей-лига дебютантлари дарвозасига жавобсиз 5та гол йўллашди.

Улсан шаҳридаги "Мунсу Уорлд Кап стадиум"да бўлиб ўтган “Улсан Хёндэ” – “Чоннам Драгонс” ўйини ҳам муросасиз тарзда ўтди. Хабарингиз бор, мезбон жамоа сафида Ўзбекистон терма жамоаси сардори Сервер Жепаров тўп суради. Бугунги ўйинда ҳам Сервер дастлабки дақиқалардан бошлаб майдонда ҳаракатланди. Рақиб жамоа сафида эса ўзбекистонлик футбол мухлисларига яхши таниш Стевица Ристич мезбонлар дарвозасига хавф солиб турди. Ўйиннинг 2-бўлим ўрталарида мезбонлар ярим ҳимоячиси Ким Тэ Хван қизил карточка билан жазолангач, меҳмонларнинг босими янада ошди. Шундай бўлса-да “Улсан” ўз дарвозаси дахлсизлигини сақлай билди ва ўйин 0:0 ҳисоби билан якунланди. Ушбу ўйиннинг 89-даиқасида Сервер Жепаров захирага олинди.

Бугунги дурангдан кейин ҳам “Улсан” чемпионат жадвали юқори поғоналарида қолди. 4-тур ўйинлари 5 апрелга белгиланган бўлиб, унда Улсан ўз уйида чемпионатда шов-шув кўтараётган “Гвангжу”ни қабул қилади.

Отабек Йўлдошев
Жанубий Корея, Сеул