«Барселона» ҳимоячиси Рональд Араухо «Интер» клубининг қизиқишлари доирасига тушиб қолди. Sport.es нашрининг хабар беришича, Италия клуби уругвайлик футболчини ёзги трансфер ойнасида ҳимоя чизиғини кучайтириш учун асосий вариантлардан бири сифатида кўриб чиқмоқда.

Шунингдек, ушбу футболчи Испания жамоасига Алессандро Бастонининг ўтиши бўйича клублар ўртасида амалга ошириладиган ўзаро алмашинув келишувининг бир қисмига айланиши ҳам истисно этилмаяпти.

Араухо Ла Лиганинг жорий мавсумида 23 та учрашувда майдонга тушиб, ўз ҳисобига учта гол ёздириб қўйишга муваффақ бўлди. Чемпионлар Лигасида эса футболчи 10 та баҳсда майдонда кўриниш берди. Унинг клуб билан амалдаги шартномаси 2031 йилга қадар мўлжалланган бўлиб, бозор қиймати 20 миллион еврога баҳоланмоқда.