Грузия пойтахти Тбилиси шаҳрида дзюдо кураши бўйича ўтказилган Гран-при туркумига кирувчи йирик халқаро турнирда терма жамоамиз аъзолари биттадан олтин ва бронза медалига сазовор бўлиб, умумжамоа ҳисобида 42 давлат орасида 8-ўринни банд этдилар.
Терма жамоамиз ҳисобига олтин медални вазни 60 кг.гача бўлган полвонлар беллашувида Ватанимиз шарафини ҳимоя қилган Шарофиддин Лутфуллаев келтирди. Истеъдодли спортчимиз даставвал саралаш беллашувларида франциялик Волид Ҳиар ва қозоғистонлик Елдос Сметовни мағлуб этиб, ярим финалда мезбон спортчи Амиран Папинашвилини, ҳал қилувчи баҳсда эса германиялик Тобиас Энглмайэрни енгиб, шоҳсупанинг энг юқори поғонасидан жой олди. Ушбу вазн тоифасида иштирок этган яна бир спортчимиз Диёрбек Ўрозбоев бронза медаль билан тақдирланди.
Эслатиб ўтамиз, мазкур Гран-При турнирида Ўзбекистон терма жамоаси қуйидаги таркибда иштирок этди:
-60 кг. Шарофиддин Лутфуллаев (олтин), Диёрбек Ўрозбоев (бронза)
-66 кг. Ришод Собиров
-73 кг. Ғиёсжон Бобоев
-81 кг. Яҳё Имомов (7-ўрин), Шаҳзод Собиров
-90 кг. Шерали Жўраев (5-ўрин), Давронбек Сатторов
-100 кг. Рамзиддин Саидов (7-ўрин)
+100 кг. Абдулла Тангриев (5-ўрин)
Маълумот учун. Мазкур Ган-При турнирида 42 давлатдан 345 нафар спортчи (201 нафар эркак – 144 нафар аёллар) иштирок этди. Мусобақада 2016 йили Бразилияда ўтказиладиган XXXI ёзги Олимпия ўйинларининг йўлланмалари учун рейтинг очколар ҳам ўйналди. Ўзбекистон дзюдо федерациясидан маълум қилинишича терма жамоамиз деярли ана шу таркиб билан 27 март куни Туркиянинг Самсун шаҳрида бошланадиган навбатдаги Гран-При турнирида иштирок этади.
