30 май куни бошланадиган Жаҳон Чемпионатига тайёргарлик кўраётган Ўзбекистон U-20 терма жамоаси Янги Зеландия U-20 жамоасига қарши апрель ойида иккита ўртоқлик учрашуви ўтказишни режалаштирган.

Маълумки, Ўзбекистон Футбол Федерацияси мамлакатда футболни янада оммалаштириш, юртимизнинг барча ҳудудларида футбол ихлосмандлари катта футбол учрашувларидан бахраманд бўлишларини таъминлаш йўлида иш олиб бормоқда.

Ушбу сиёсатни амалга оширишдаги яна бир қадам сифатида Янги Зеландия U-20га қарши дастлабки учрашув Фарғона шаҳрида яқинда қуриб битказилган, замонавий "Истиқлол" стадионида ўтказишга қарор қилинди. Ўйин 3 апрель куни, соат 16:00да бошланади.

Бу жамоалар ўртасидаги иккинчи учрашув 6 апрель куни бўлиб ўтади.

Иккинчи учрашув қайси стадионда ўтказилиши тез орада маълум қилинади.