Ғузорда кечган "Шўртан" - "Сўғдиёна" "учрашувидан сўнг меҳмонлар бош мураббийи ўз фикрларини билдириб ўтди.

- Иккинчи учрашувда ҳам йирик ҳисобда мағлубиятга учраш бу яхши аломат эмас. Бугунги ўтказиб юборилган голлар ҳаммаси ўзимизнинг хатолар ва яна хатолар эвазига бўлди. Бошланиши ёмон бўлмаганди, голгача ҳаммаси кўнгилдагидек эди. Годан сўнг, йигитлар руҳан “синиб” қолишди...

Билмадим нимага бундай бўлди, ўзим ҳам тушунмадим. Ҳакамлар ҳақида эса гапиришни ҳам хоҳламайман. Жарима майдончаси ичидаги эркин зарба, кейин эса пенальти, тушунмадим. Ҳаммаси биз томонга бўлди...

Бу гапларим билан ўзимни оқлаш ниятим йўқ. Лекин барибир уларнинг ҳаракатидан кўнглим тўлмади. Нима кераги бор эди бундай қилиб?..

- Ўтган учрашувдаги йирик мағлубиятдан сўнг, жамоа аъзоларини руҳан ўз ҳолатига қайтариш осон бўлмади, дедингиз...
- Ҳа, шундай. Бу ёғи ҳам осон кечмаслиги аниқ. Кейинги рақибларимизни қаранг, “Локомотив”, “Навбаҳор”... Юқорида болалар ҳақида гапирдим, аслида биринчи ва иккинчи турлардаги йирик мағлубият ҳар қандай мураббийни ҳам руҳан тушкун кайфиятга солиб қўяди. Шунинг учун бугунги ўйин ҳақида аниқ бир гап айтишга сўз ҳам топа олмаяпман. Энди уйга боргач, таҳлил қиламиз, ўйин видеотасмасини кўрамиз. Хуллас, бир тўхтамга келамиз.

Икки учрашувдаги натижага келсак, ҳеч кимни айблай олмайман. Ҳамма айб ва масъулиятни ўз зиммамга оламан. Балки жамоада ниманидир ўзгартириш керакдир. Ёки ўзим бироз дам олишим зарурдир. Вақт нуқтаи назаридан олиб қарасак, чемпионат аллақачон бошланиб кетди. Вақт эса олий ҳакам.