"Барселона" ёзги трансфер ойнасининг сўнгги қисмида "Арсенал" ҳужумчиси Габриэл Жезусни ўз сафига қўшиб олди. Mundo Deportivo маълумотига кўра, каталонияликлар бу трансфер устида махфий равишда иш олиб борган.
"Барселона" раҳбарияти трансфер ойнасининг сўнгги соатларига қадар "Атлетико" ҳужумчиси Хулиан Альваресни қўлга киритиш имкониятини сақлаб турган. Бироқ клуб якунда ҳужумчисиз қолиб кетмаслик учун параллел равишда Жезус билан музокара бошлаган.
Бразилиялик футболчи таклифга дарҳол ижобий жавоб берган. Унинг "Арсенал"даги мавқеи Кай Хаверц ва Виктор Дьёкереш фонида пасайганди. Қолаверса, "Барселона" либосида ўйнаш Жезуснинг болаликдаги орзуларидан бири бўлган.
Каталония клуби трансферни амалга оширишдан аввал футболчининг тиззасидаги аввалги жароҳатларга алоҳида эътибор қаратган. "Барселона" мутасаддилари Жезусни Англияда даволаган мутахассислар билан боғланиб, унинг жисмоний ҳолати бўйича ижобий хулоса олганидан кейингина келишувни якунлашга қарор қилган.
Ҳанси Флик ҳам 29 ёшли ҳужумчининг трансферини маъқуллаган. Немис мутахассиси форварднинг техникаси, ҳужум чизиғининг бир нечта позициясида ҳаракат қила олиши ва тўпсиз ўйиндаги юқори прессингини қадрлайди.
Молиявий жиҳатдан ҳам келишув "Барселона" учун қулай бўлган. Жезуснинг "Арсенал" билан шартномаси 2027 йилда якунланиши сабабли Лондон клуби 10 млн евро кафолатланган трансфер пулига рози бўлган.
Жезус эса "Барселона"нинг молиявий имкониятларига мослашиш учун "Арсенал"да олган маошига нисбатан сезиларли камайтиришга розилик берган. Бразилиялик билан уч йиллик шартнома имзоланган.
