Ўзбекистон ва Янги Зеландияга қарши ўртоқлик ўйинлари ўтказилиши эълон қилинганидан буён корейс ОАВлари тинмай кучсиз рақиблар билан ўйиндан наф йўқлиги ҳақида бонг уриб келаётган эди. Бугун Пажу шаҳридаги терма жамоа базасига йиғилиб машғулот ўтказишни бошлашгач, терма жамоа бош мураббийи Ули Штилике бу ҳақда шундай деди:
«Албатта, Ўзбекистон терма жамоаси ФИФА рейтингида биздан пастки поғоналарга жойлашган бўлса ҳам Осиё Кубоги чорак финал босқичида қийинчилик билан мағлуб этганлигимизни унутмаслик лозим. Охирги вақтларда бизга энг кўп хавфли вазиятлар ярата олган жамоа ҳам айнан Ўзбекистон ҳисобланади. Агар Янги Зеландияни ҳам кучсиз деётган бўлсангиз, уларнинг ўтган йили ноябр ойида Хитой билан ўтказган ўйинини кузатишингизни маслаҳат бераман. 1:1 ҳисоби билан тугаган ўйинда Хитой базўр дурангга эришган эди».
Бугунги хабарга кўра, ўтган дам олиш кунлари Бундеслига доирасидаги ўйинда кичик жароҳат олган «Хоффенхайм» ҳимоячиси Ким Жин Су терма жамоанинг бу сафарги йиғинига кела олмайдиган бўлди.
Отабек Йўлдошев
Жанубий Корея, Сеул
