Kun.uz: Бундан бир ой муқаддам Руслан Чагаев ўзининг WBA йўналиши бўйича жаҳон чемпиони камарини ҳимоя қилиши учун 30 кун мобайнида ушбу йўналиш рейтингида 4-ўринни эгаллаб турган 35 ёшли австралиялик Лукас Браун билан рингга чиқиши бўйича келишувга эришиши мажбурий қилиб белгилаб қўйилганди.
Агар 27 мартга қадар ушбу келишув амалга ошмаса, промоутерлар учун очиқ тендерлик танлови белгиланади. Чагаевдан камар тортиб олинади ва бошқа эгасиз камар учун бошқа жанг белгиланиши мумкин.
Boxingscene.com интернет нашрининг ёзишича, австралиялик боксчи жангни ўз ватанида ташкиллаштириш ниятида бўлиб турибди.
“Ҳозир фаолиятимнинг энг юқори чўққисидаман. Айнан мана шундай пайтда австралиялик биринчи жаҳон чемпиони сифатида тарихга кирмоқчиман. Мен аллақачон ушбу учрашувга тайёргарликни бошлаб юбордим. Умид қиламанки, титул меники бўлади. Чагаев билан ҳар қандай жойда рингга чиқишга тайёрман, бироқ жанг Австралияда бўлса хурсанд бўлардим. Мен рақибимни айнан ўз ватанимда, мухлислар қаршисида нокаутга учратишни истайман”, дея гапириб ўтди Браун.
Маълумот ўрнида таъкидлаш жози, 35 ёшли Браун шу кунгача 22 жанг ўтказиб уларнинг барчасида ғалаба қозонган 19 маротаба рақибларини муддатидан олдин мағлубиятга учратган (22-0, 19 КО). Руслан Чагаев ҳисобида эса 33 ғалаба, 2 дуранг ва 1 мағлубият мавжуд (33-2-1, 20 КО).
Эслатиб ўтамиз, Чагаев ҳозирги бутунжаҳон бокс ассоциацияси йўналиши камарини 2014 йилда июлида Фрес Окендога қарши жангда ғалаба қозониб қўлга киритган.
