Ижтимоий тармоқларда «Барселона» ва Испания терма жамоаси ҳужумчиси Ламин Ямалнинг севгилиси — испаниялик модель Инес Гарсианинг эски видеороликлари пайдо бўлди. Улар танишгунига қадар ёзиб олинган ушбу видеоларда қиз футболчини танқид қилган ва уни бошқа ўйинчилар билан солиштирган.

Модель Ямал пулсиз «оддий мигрант» бўлишини таъкидлаган, «Ямал ёки Мбаппе?» деган саволга эса: «Беллингем», — деб жавоб берган.

«Агар унда шуҳрат ва пул бўлмаганида, Ники Николь (Ямалнинг собиқ севгилиси) унга ҳатто эътибор ҳам қаратмаган бўларди. Агар вақтни орқага қайтарсак ва у пулсиз оддий мигрант бўлиб қолганида, қиз уни пайқаган бўлармиди? Очиғини айтсам, ўзим ҳам унинг ўрнида бўлганимда Ямални танламасдим!» — дейди Гарсианинг сўзларини келтирган The Times of India.

Инес Гарсиа бу роликларни испаниялик футболчи билан танишгунига қадар анча олдин ёзиб олган, бироқ мухлислар уларни энди топиб олишди. Қайд этилишича, Ямал билан танишгунга қадар Гарсиа бошқа эркак билан беш йил давомида учрашиб юрган. Ламин унга илк бор қизиқиш билдирганидан икки ҳафта ўтиб, у аввалги муносабатларига чек қўйган.