Бугун Жанубий Корея терма жамоаси аъзолари Теджон шаҳрига етиб келишди. Бу ерда 27 март куни Ўзбекистон терма жамоасига қарши ўртоқлик ўйини ўтади. Теджон шаҳрида корейс ОАВлари терма жамоанинг етакчи ярим ҳимоячиси, "Байер Леверкузен" (Германия) аъзоси ҳисобланган Сон Хеунг Миннинг фикрлари билан қизиқди.
"Ростини айтсам, Теджонга биринчи марта келишим. Бу ердаги стадиондан терма жамоамиз тарихида яхши хотиралар қолганлигини биламан. Айнан шу стадионда акаларимиз 2002 йилги ЖЧда Италияни мағлуб этишган. Биз ҳам бундай ёқимли хотираларни давомли қилиш истагидамиз. Бунинг устига Теджон шаҳрида футболнинг ашаддий мухлислари истиқомат қилишидан хабарим бор. Шунинг учун биз албатта ғалаба қозонамиз. Албатта, Осиё Кубогида Ўзбекистон терма жамоасини мағлуб этганмиз ва бундан кайфиятимиз чоғ. Лекин эҳтиёткорлик ва хотиржамликни сақлаш керак. Чунки Ўзбекистон Осиё Кубогидаги мағлубият ўчини олишга интилиши табиий", - деди Германия бундеслигасида тўп сурадиган Сон Хеунг Мин.
Отабек Йўлдошев
Жанубий Корея, Сеул
