Ўйиндан кейин корейслар бош мураббийи Ули Штилике натижа ўзи кутганидек чиқмаганлигидан ранжиганлигини билдирди.
«Осиё Кубогидаги тўқнашувимиздан кам бўлмаган даражада катта босимли ўйин бўлди. Тўп ўтказиб юборганлигимизни ҳазм қилолмаяпман. Мен кутган натижа бу эмасди» - дейди германиялик мутахассис.
«Лекин мен бизнинг жамоада орқага кетиш бошланди демайман. Гарчи Ўзбекистон 2-бўлимда жисмоний томондан яхши кўринган бўлса ҳам биз ҳужумда яхши имкониятлар ярата олдик. Янги футболчиларнинг ҳаммаси менга ёқди. Таркибимизда рақобат ошди. Бугун кўп футболчиларни синовдан ўтказдик. Мағлубиятга учралмаса бас - тажриба ўтказишда давом этавериш керак. Менинг дилимни хира қилгани - Ли Жонг Хёбнинг жароҳат олгани бўлди. Енгил жароҳати бор Жи Донг Вонни таваккал қилиб майдонга тушира олмасдим. Шунинг учун ярим ҳимоячи Ку Жа Чолни ҳужумда ўйнатишга мажбур бўлдим», - деди Ули Штилике.
Отабек Йўлдошев
Жанубий Корея, Сеул
