Хабар берганимиздек, бугун Туркиянинг Самсун шаҳрида дзюдо бўйича Гран-При туркумига кирувчи йирик халқаро турнир старт олди. Мазкур нуфузли мусобақада дунёнинг 70 давлатидан 566 нафар спортчи жами 14 вазн тоифасида татамига чиқяпти. Мусобақада Ўзбекистон эркаклар терма жамоасининг 12 нафар аъзоси ҳам иштирок этмоқда.

Бугун эркаклар ўртасида 60 ҳамда 66 кг вазн тоифаларида баҳслар бўлиб ўтди. 60 кг вазн тоифасида татамига чиққан Шарофуддин Лутфуллаев барча рақибларини енгиб, финалга етиб келди. Унинг финалдаги рақиби озарбайжонлик Орхан Сафаров бўлади. Сафаров ярим финалда яна бир ҳамюртимиз Диёрбек Ўрозбоевни мағлуб этди.

66 кг вазн тоифасидаги терма жамоамиз етакчиси, икки карра Олимпия ўйинларининг бронза медал совриндори Ришод Собиров ҳам финал иштирокчисига айланди. Собиров ярим финалда португалиялик Сержиу Олейникни таслим этди.   

Эслатиб ўтамиз, Самсун татамиларида юртимиз спорт шарафини Шарофиддин Лутфуллаев, Диёрбек Ўрозбоев (иккиси ҳам 60 кг) ва Ришод Собиров (66 кг)дан ташқари Сарвар Шомуродов, Ғиёсжон Бобоев (иккиси ҳам 73 кг), Яҳё Имомов, Шахбоз Собиров (иккиси ҳам 81 кг), Шерали Жўраев, Давронбек Сатторов (иккиси ҳам 90 кг), Рамзиддин Саидов (-100 кг) ҳамда мутлоқ вазн тоифаси Абдулла Тангриев ва Болтабой Болтаевлар ҳимоя қилади.