Биринчи лигада иштирок этиши кўзда тутилган “Орол” жамоаси ҳам мавсумга пуҳта тайёргарлик кўрди. Жамоа бош мураббийи Неъматилло Қуттибоевнинг таъкидлашича, “Орол” жамоаси ўз имкониятларидан келиб чиққан ҳолда тайёргарлик кўрди ва мавсумга тайёр.
- Биз имкониятларимиздан келиб чиққан ҳолда тайёргарлик кўрдик, - деб гап бошлади Қуттибоев. Айтиш керакки, биз ёшларга катта аҳамият берамиз. Таркибимизни жорий йилда асосан 1995 ва 1998 йилгача бўлган ёш футболчилар ҳимоя қилади. Ўйлайманки, қисқа вақт ичида қилган меҳнатларимиз ўз самарасини беради.
- Тайёргарлик жараёнидан қониқиш ҳосил қилдингизми?
- Тайёргарликдан қисман бўлса ҳам қониқиш ҳосил қилдим. Энди мавсум мобайнида барчаси юзага чиқади. Ишонаманки, “Орол” ўтган йилдаги сингари жорий мавсумда ҳам яхши ўйинлар кўрсатади.
- Молиявий муаммолар ҳақида фикрингиз?
- Молиявий ҳолатимиз анча яхшиланиб бормоқда. Клуб ҳомийлари қўлидан келганча барча ёрдамларни беришга ва жамоани оёққа турғазишга кўмаклашмоқда.
Иззатбек Абдуваҳобов суҳбатлашди.
