Cadena Ser нашрининг хабар қилишича, Испания ҳукумати “Барселона” жамоасининг “Сантос” билан амалга оширилган трансфери, яъни, “Неймар иши” бўйича суриштирув ишларини давом эттирмоқда.
Бугун, клубнинг амалдаги президенти Хосеп Бартомеу “Неймар иши” масаласида Испания прокуратурасига чақирилди ва у ерда сўроқ қилинди. Сўроқ қилиш давомида “Барселона” президенти қўйидаги сўзларни айтиб ўтди.
- 2013 йилда ўша даврдаги бош мураббий Тито Виланова “Сантос”дан Неймарни сотиб олишни вазифа қилиб қўйганди. Ўзи эса Нью-Йорк шаҳрида кимётерапия муолажаларини олаётганди.
Биз унинг айтганини қилишга қарор қилдик, чунки, Виланова Давид Вилья билан шартнома узайтиришни истамаганди. Ўша пайтда собиқ клуб президенти Сандро Росель Неймар трансфери борасида музокараларни бошлаганди, - дейди Бартомеу.
Хосеп Бартомеу мазкур ишга аралашмаганини таъкидлаб ўтганди. Шунга қарамай, Испания ҳукумати Сандро Росельни ҳам, Хосеп Бартомеуни ҳам жиноий жавобгарликка тортмоқчи. Эслатиб ўтамиз, "Барселона" клуби Испания ҳукуматига солиқ тўламаслик учун, Неймарнинг трансфер нархини камайтириб кўрсатган.