3 апрель куни "Пахтакор" олий лиганинг 3-турида "Бухоро"ни қабул қилади.
"Бухоро"га шу мавсумдан Александр Мочинов бошчилик қилмоқда. Жамоа дастлабки икки турни "Бунёдкор" ва "Динамо"га қарши ўтказиб, 1 очко жамғарди. Таркибда ўтган йилга солиштирганда кўплаб ўзгаришлар амалга оширилган.
Ўтган йили Бухородаги баҳсда 0:0 ҳисоби қайд этилган бўлса, Тошкентда мезбонлар 4:0 ҳисобида ғалаба қозонган ва чемпионликка эришганди. Ҳозиргача олий лигада ўзаро 44 учрашув ўтказилган. Уларнинг 31тасида "Пахтакор", 6тасида "Бухоро" зафар қучган. 7 беллашувда дуранг кузатилган. Жамоамиз рақиб дарвозасини 97 марта ишғол қилган ва 31 марта тўп ўтказиб юборган.
Тошкентдаги 22 ўйиннинг 20тасида "Пахтакор" зафар қучган. Бир мартадан дуранг ва рақиб ғалабаси кузатилган. Бухороликлар охирги марта Тошкентда 1996 йил очкога эга чиқишган. Ўшанда "Бухоро" сафардаги ягона ғалабасини нишонлаган. Ундан кейин ўтказилган 17 учрашувнинг барчасида "шерлар" устун келган.
Ёшлар таркиблари беллашуви 2 апрель, пайшанба куни Қибрайдаги стадионда 15:00да бошланади. Асосий жамоалар ўйини 3 апрель, жума куни "Пахтакор" стадионида соат 18:00да старт олади.
"Пахтакор" - "Бухоро" учрашувига ташриф буюрадиган мухлислар "Омадли мухлис" акциясида иштирок этиб, 2та телевизор, титул ҳомий "Ucell" компанияси ва "Пахтакор" футбол клубининг эсдалик совғаларига эга чиқиш имкониятига эга бўлади. Ишқибозларни стадионга келиб, жамоамизни қўллаб-қувватлашга чақириб қоламиз.
3 апрель, жума
"ПАХТАКОР" - "БУХОРО"
Ҳакамлар: Мурод Муҳаммедов (Тошкент вилояти), Тимур Гайнулин (Тошкент), Санжар Шоюсупов, (Тошкент), Жасур Мухторов (Тошкент).
Назоратчи: Радик Серазетдинов (Тошкент).
