Спорт гимнастикаси бўйича Ўзбекистон терма жамоаси аъзоси Оксана Чусовитина Словения пойтахти Люблянада бўлиб ўтган Жаҳон Чақирув кубогида энг яхши натижани кўрсатди.

12news.uz’нинг хабар беришича, таяниб сакраш бўйича машқларда Оксана Чусовитина 14,600 баллик кўрсаткич билан рақиблари – словениялик Тея Белак (14,412 балл) ва голландияликк Ноэль ван Клаверен (14,325)ни ортда қолдирди.

Бу ўзбекистонлик афсонавий гимнастикачи, олтита ёзги Олимпия ўйинлари иштирокчиси ҳисобланган 39 ёшли Чусовотинанинг мавсумдаги иккинчи муваффақиятидир.

Аввалроқ, у Германиянинг Котбусс шаҳрида бўилб ўтган спорт гимнастикаси бўйича Жаҳон кубогида ҳам ғолибликни қўлга киритган эди.

Маълумот учун, бир неча ойдан сўнг 40 ёшга тўладиган Оксана Чусовитина 2016 йили Бразилиянинг Рио-де-Жанейро шаҳрида бўлиб ўтадиган Олимпия ўйинларида иштирок этишни мақсад қилган.