Хабарингиз бор, бугун "Локомотив" Осиё чемпионлар лигасининг 4-тур доирасида "Ас-Садд"га қарши баҳс олиб боради. Гуруҳ жадвалидан келиб чиқиб айтганда, "Локомотив"га "Ас-Садд" билан кечадиган беллашувда фақат ғалаба керак.
Зеро "темирйўлчилар" ҳозирча бир очко билан охирги ўринда боришяпти. "Ас-Садд" эса 7 очко билан биринчи ўринни эгаллаб турибди. Шунингдек, "Ал Ҳилол" ҳисобида 4 очко, "Фулад" ҳисобида эса 3 очко мавжуд.
Агар бугун "Локомотив" зафар қучадиган бўлса, жадвалда учинчи ўринга кўтарилиб олади. Бунинг учун "Фулад" сафарда "Ал-Ҳилол"га имкониятни бой бериши керак бўлади. "Локомотив" - "Ас-Садд" баҳси бугун ТТЗдаги "Локомотив" стадионида бўлиб ўтади. Ўйиннинг бошланиш вақти - 16:00. "Ал Ҳилол" - "Фулад" учрашуви эса Тошкент вақти билан 22:45да старт олади. Қуйида "Локомотив" - "Ас-Садд" ўйинига доир баъзи маълумотларни келтириб ўтамиз.
"ЛОКОМОТИВ"
- Жамоа ҳамон илк ғалаба нашидасини суриш илинжида. Чунки "Локомотив" Осиё чемпионлар лигасида ҳозирча зафар қучгани йўқ. Жамоа ўз майдонидаги аввалги ўйинда "Фулад" билан 1:1 ҳисобини қайд этди.
- "Локомотив" учта ўйинда ўз дарвозасидан 10та гол ўтказиб юборди. Бу эса жуда хунук кўрсаткич ҳисобланади. Бу йилги иштирокчилар орасида биргина Вьетнамнинг "Бин Дуонг" клуби "Локо"га нисбатн битта кўп гол ўтказган - 11та.
- Ҳимоячи Салим Мустафоев сариқ карточкалари иккита етгани туфайли бугунги баҳсни ўтказиб юборади. Аввалги ўйинда иштирок эта олмаган Лутфулла Тўраев эса бу сафар майдонга тушиши мумкин.
"Ас-Садд"
- Ўтган ўйинда қайд этилган 6:2 ҳисоби ОЧЛдаги энг йирик ғалаба сифатида тарихга кирди. "Ас-Садд"нинг бунгача энг йирик ғалабаси 2011 йилда рўй берган бўлиб, улар Суриянинг "Ал Иттиҳод" клубини 5:1 ҳисобида енгишган.
- "Ас-Садд" бунгача Ўзбекистонда уч марта тўп сурган, икки марта мағлубиятга учраган ("Нефтчи" билан ўйинларда) ва "Пахтакор"га қарши дуранг қайд этган.
- "Ас-Садд" охирги бор сафарда 2011 йил "Чонбук Моторс" устидан ғалабага эришган. Жамоа шундан бери сафарда олтита ўйин ўтказган бўлса, бирортасида ҳам уч очкони қўлга кирита олмаган.
- Халфан Иброҳим гуруҳ босқичида учта тўп киритди. У ОЧЛдаги голлари ҳисобини 14тага етказиб олди.
