"Лахвия" - "Бунёдкор" учрашуви якунлангач, ҳар иккала жамоа бош мураббийлари ОАВ ходимларининг саволларига жавоб қайтарди, дея хабар бермоқда "Бунёдкор" расмий твиттери.

Сергей Лушан (“Бунёдкор” бош мураббийи): - "Лаҳвия"ни ғалаба билан табриклайман! Жамоага тез орада Қатар чемпионлигини расмийлаштиришини тилайман! 

"Лаҳвия" жуда яхши ва тартибли жамоа. Лекин уларни биздан устун дея олмайман. Ушбу баҳсга тайёргарлигимиз ўзимиз кутгандек бўлмади. Аввалига 18, кейин Доҳага учишдан олдин сўнгги кунгача 15 нафар футболчисиз тайёрландик. Бу катта йўқотиш. Ҳаёт давом этади. 

Энди бор эътиборимизни ички мусобақаларга қаратамиз. Хатоларимиз устида ишлаймиз. Тан оламан, "Ал Жазира"ни жуда катта иштиёқ эвазига ютдик. Лекин гуруҳдан чиқишимиз осон бўлмаслигини билардим. Биз ўзимизга янги йўл танлаганмиз. Ёшларни тарбиялаш ва эртангги кунимизга уларни тайёрлаш - бош мақсадимиз. 

"Лаҳвия" ҳали ўсади ва мусобақада узоқроққа боради, деб ўйлайман. Балки мусобақа ғолиблиги учун курашар. Бизга бироз вақт керак. Вақти келиб, ўз тарбияланувчиларимиз ҳисобига катта марраларни забт этамиз. Бу кунлар албатта келади. 

Акбар Тўраев жуда ажойиб ва иқтидорли дарвозабон. 24-25 ёш дарвозабон учун жуда ёш деб ҳисоблайман. Акбар тез орада терма жамоамизнинг энг асосий посбони бўлиб етишишига ишонаман. У бугун жуда кўп бор жамоани голлардан қутқарди. Имкониятимиз йўқолган бўлса-да, кейинги ўйинларда юртимиз шаъни ва ОЧЛ рейтинги учун очко йиғишга боримизни берамиз.