Бугун мамлакатимиз олий лига жамоалари 4-тур учрашувларини бошлашади. Тақвимга кўра, дастлаб мухлислар «Навбаҳор» (Наманган) – «Сўғдиёна» (Жиззах), «Металлург» (Бекобод) – «Нефтчи» (Фарғона), «Шўртан» (Ғузор) – «Динамо» (Самарқанд), «Қўқон-1912» (Қўқон) – «Андижон» (Андижон) жамоалари баҳсига гувоҳ бўлишади.

Яна учта ўйин эса 12 апрелда бўлиб ўтиши белгиланган. Унда «Машъал» (Муборак) – «Олмалиқ» (Олмалиқ), «Қизилқум» (Навоий) – «Пахтакор» (Тошкент) ҳамда «Бухоро» (Бухоро) – «Насаф» (Қарши) жуфтликлари майдонга чиқади.

Мазкур тўртинчи турни якунлаб берувчи «Локомотив» (Тошкент) – «Бунёдкор» (Тошкент) баҳси эса 13 апрель куни ўтказилади.

Шу ўринда мухлислар учун ўзига хос янгиликни билдириб ўтсак, Навоий вилояти ҳокимлиги, "Қизилқум" ПФК ва Ўзбекистон телерадиокомпанияси ҳамкорлигида илк маротаба Навоий шаҳрида бўладиган "Қизилқум" — "Пахтакор" жамоалари баҳси ойнаи жаҳон орқали тўғридан-тўғри олиб кўрсатилади.

Учрашув Навоий шаҳридаги Умид қўрғонида қад ростлаган "Ёшлар" спорт мажмуасида бўлиб ўтади. Спорт телеканали орқали жонли намойиш этиладиган мазкур ўйинни Зафар Имомхўжаев ҳамда Раҳмонқул Болтаев биргаликда шарҳлаб боришади.

"Қизилқум" — "Пахтакор" жамоалари учрашуви 12 апрель куни соат 17.30 да бошланади.