Kun.uz: Россиялик таниқли футбол таҳлилчиси Александр Бубнов ўзбекистонлик футболчи Одил Аҳмедовнининг имкониятларига жуда юқори баҳо бермоқда. У “Краснодар” ва ЦСКА ўртасида кечган охирги тур ўйинида Одил Аҳмедов кўрсатган ўйиндан ҳайратларини яшира олмади.
“Мен Россия футболи тарихини синчиклаб текшириб, яна шундай натижа қайд этган футболчини излашимдан наф бўлмайди. Одил Аҳмедов техник ва тактик ҳаракатлари билан ўзининг феномал футболчи эканлигини кўрсатиб бўлди. Ҳатто айтиш мумкинки, нафақат рус футболи тарихида, балки жаҳон футболи тарихида ҳам Аҳмедовнинг ҳозирги даражасида ўйнаган таянч яримҳимоячиси йўқ. Таянч яримҳимоячилари учун эталон сифатида кўрсатиладиган “Барселона” футболчиси Серхио Бускетс ҳам Одил Аҳмедовнинг ЦСКА жамоасига қарши ўйиндаги кўрсаткичларини такрорлай олмайди”, дейди Бубнов.
“У ўйинда 152 марта техник-тактик ҳаракатлар (ТТҲ)ни амалга оширди. (Одатдаги таянч яримҳимоячиларида эса бир ўйинда 120 марта ТТҲ амалга ошириш яхши кўрсаткич ҳисобланади – изоҳ Кун.уз). Уни эртагаёқ “Барселона” ёки “Реал” таркибида майдонга тушириш мумкин. У ҳеч қандай муаммосиз юқори даражадаги ўйинларда иштирок эта олади. Агар “Краснодар” таркибида унинг савиясига яқинроқ яна битта шундай ўйинчи бўлганида ЦСКА ушбу ўйинда дуранг ҳақида орзу қилмаса ҳам бўлар эди. Одилнинг бошқа жамоадошлари, Перрейра, Ари, Лаборде ва Мамаев каби ўйинчилар у яратиб берган имкониятларни ҳавога совуриш билан банд бўлишди. Жамоанинг ўйини биринчи навбатда Одил Аҳмедовнинг ўйинига боғлиқ бўлиб қолмоқда”, дейди Александр Бубнов Sportbox.ru нашрига берган интервьюсида.
Маълумот учун, “Краснодар” 19 апрель куни Москвада ЦСКАга қарши сафар ўйинидан 1:1 ҳисобидаги дуранг билан қайтганди.
