"Локомотив" футбол клуби ўзаро келишувга кўра, жамоа ҳужумчиси Алишер Шоғуломов билан тузилган шартномани бекор қилди. Бунга сабаб футболчининг клуб ички тартиб-қоидаларига риоя қилмагани бўлди, дейилади "темирйўлчилар" расмий сайти хабарида.

Хабарингиз бор, 15 апрель куни "Локомотив" ўринбосарлари ёшлар лигаси 5-тур доирасида Самарқандда "Динамо" меҳмони бўлишди. Бу ўйинда ўринбосарларимиз мураббийи Руслан Аҳмедхонов ҳужумчи Алишер Шоғуломовни асосий таркибга эмас, балки захирадагилар рўйхатига киритди. Бундан кўзланган мақсад, Шоғуломовни иккинчи таймда майдонга тушириб, жамоа ҳужумини янада кучайтириш эди.

Лекин Алишер Шоғуломов мураббийнинг бу қароридан хафа бўлиб, ҳали ўйин бошланмасданоқ кетиб қолди. У шу куни ҳатто "Локомотив" истиқомат қилган меҳмонхонага ҳам бормади. Шоғуломов шу кетганича мана орадан неча кун ўтган бўлса, клубга келиб бирор марта кўриниш бермади. Жамоа маъмурлари унга қўнғироқ қилишган пайт футболчи қўнғироқларга жавоб бермади. Кейинчалик маълум бўлишича, унинг ўзи "Локомотив"дан кетишни истади ва клуб ҳам шунга монанд Алишер Шоғуломов билан шартномани бекор қилди.