Иқтидорли дарвозабон Акмал Турсунбоев ҳозирда фаолиятини биринчи лига клубида давом эттирмоқда. Турсунбоев “Пахтакор”нинг фарм-клубида тўп сурмоқда. “Цементчи”га қарши ўйиндан сўнг дарвозабон билан қисқача суҳбатлашдик.
- Ўйин яхши ўтди. Бу ўйиннинг илк дақиқаларидан майдонга тушдим. Бироқ иккинчи бўлимда мени алмаштиришди. Ўрнимга Ботирали Эргашев дарвозадан жой эгаллади. Эргашев Ўзбекистон ёшлар терма жамоасига номзод эканлиги туфайли, унга имконият яратишди. Умуман, учрашув яхши ўтди.
- Акмал, иқтидорли бўлишингизга қарамай, биринчи лигада тўп сурмоқдасиз. Бу нима билан боғлиқ?
- Мен учун асосийси, ўйин амалиётига эга бўлиш ҳисобланади. “Пахтакор-2”да тўп сураётганимдан афсусланмайман. Бу ерда кўпроқ ўйнаб турсам ва формамни бир маромда ушлаб турганимдан мамнунман. Қолгани вақт кўрсатади. Биласиз, “Пахтакор”да имкониятлар кенгдир. Терма жамоа мураббийлари, клуб мутасаддилари кузатишади. Шу орқали ҳам яхши даражага кўтарилиш мумкин.
- Демак, бу ердаги фаолиятингиздан қониқиш ҳосил қилмоқдасиз?
- Шундай. Асосий ва ёшлар жамоалари билан биргаликда машғулотларда иштирок этмоқдаман. Шундай экан, нолийдиган жиҳатни умуман кўрмаяпман. Асосийси, дарвозабон сифатида малакамни ошириб бораётганимдан кўнглим тўқ.
Иззатбек Абдуваҳобов суҳбатлашди.
