«Бавария» футболчиси Арьен Роббен «Боруссия»га қарши бўлиб ўтган Германия кубогининг ярим финал баҳсида жароҳат олди.

31 ёшли голландиялик футболчи жароҳат боис бир ойдан ошиқроқ давомида даволанганди. Дортмундликларга қарши ўйиннинг 64-дақиқасида Роббен захирадан тушди ва орадан 17 дақиқа ўтиб, майдонни тарк этди. Футболчининг болдир мушаги чўзилгани тахмин қилинмоқда.

Мюнхенликлар ҳужумчиси Роберт Левандовски эса ўйиннинг 117-дақиқасида «Боруссия» дарвозабони Митчелл Лэнгерак билан тўқнашиб кетди ва ўша заҳоти шифохонага етказилди. Польшалик футболчининг мияси чайқалган бўлиши мумкин.

Бундан ташқари, «Бавария» бош мураббийи Хосеп Гвардиоланинг хабар беришича, Тиаго Алькантара кучли зарба қабул қилиб олганидан кейин алмаштирилган.

Эслатиб ўтамиз, «Бавария» 6 май куни ЕЧЛ ярим финал босқичининг дастлабки ўйини доирасида «Барселона» меҳмони бўлади.