“Насаф”нинг ОЧЛ 6-туридаги рақиби – Саудия Арабистонининг “Ал Аҳли” клуби кеча ўз чемпионати доирасида “Ал Фатҳ” жамоасини қабул қилиб, йирик ғалабага эришди – 5:0.

Учрашувнинг 29-дақиқасида Таисир Ал Жассим ўйинда ҳисобни очиб голлар шоусини бошлаб берган бўлса, захирадан майдонга тушганига Моҳанад Асири биринчи бўлимнинг сўнгги сонияларида орадаги фарқни иккитага оширди. 57-дақиқада Мустафа Ал Бассас ҳисобни йирик кўринишга келтирган бўлса, 74-дақиқада меҳмонлар аъзоси Абдуллоҳ Ал Доссари автогол муаллифига айланди. Ўйингга сўнгги нуқтани жиддаликларнинг бразилиялик легионери Освалдо қўйди. Моҳанад Асири ўрнига захирадан майдонга тушган легионер 88-дақиқада бешинчи тўпни дарвозага киритиб, ўйинда якуний ҳисобни ўрнатди -5:0.

Ушбу ғалабадан кейин “Ал Аҳли” футболчилари 58 очко билан Саудия чемпионати турнир жадвалида иккинчи поғонада боришмоқда. Чемпионат тугашига тўрт тур қолганди жиддалик футболчилар чемпионат пешқадами “Ал Наср” футболчиларидан икки очко ортда қолишмоқда.

“Ал Аҳли” футболчилари Саудия чемпионатида навбатдаги учрашувни 10 май куни ўз майдонларида “Ал Таавон” жамоаси билан ўтказади. Унгача жиддаликлар 5 май куни Қаршида жамоамиз билан куч синашади.