“Бунёдкор” футбол клуби делегацияси Теҳроннинг “Персеполис” клуби билан сафар учрашувини ўтказиш учун Эронга етиб келди.

“Қалдирғочлар” 4 май куни соат 08:25да Тошкент-Дубай-Теҳрон йўналиши бўйича парвозни амалга оширишиб, Эрон пойтахтига соат 20:00да етиб келишди. Теҳрон халқаро аэропортидан шаҳар марказигача таҳминан бир ярим соат автобусда йўл юрган тошкентликлар “Персеполис” клуби томонидан аввалдан тайёрлаб қўйилган “Parsian Azadi” отелига жойлашишди.

Эртага “Персеполис” – “Бунёдкор” учрашуви олдидан бир қатор расмий тадбирлар бўлиб ўтади. Жумладан, ўйинолди матбуот анжумани, учрашув расмийлари ва ҳар иккала клуб вакиллари йиғилиши, шунингдек қитъамизнинг энг улкан аренаси – “Озоди” стадионида жамоаларнинг расмий машғулотлари ўтказилиши режалаштирилган.

Эслатиб ўтамиз, ОЧЛ-2015 гуруҳ босқичи сўнгги тури доирасидаги "Персеполис" - "Бунёдкор" учрашуви 6 май куни Тошкент вақти билан соат 21:05да (Эронда 20:35 бўлади) бошланади.